Увс аймгийн Засаг дарга Д.Батсайхан аялал жуулчлалаа хөгжүүлж, амьдрах орчин нөхцөлөө сайжруулахын тулд жорлонгийн асуудлыг шийдэх хэрэгтэй гэж үзсэний үндсэн дээр Германы олон улсын хамтын ажиллагааны нийгэмлэг Этис хөтөлбөрт санал тавьж, хамтран ажиллаж өнөөдөр туршилтын байдлаар 9 сая төгрөгний санхүүжилттэй гурван эко жорлонг байршуулахаар гэрээнд гарын үсэг зурлаа. Энэхүү ажил нь судалгаа шинжилгээ хийгдсэний үндсэн дээр өнөөдөр ийнхүү аймаг орон нутаг маань эко жорлонтой болох их ажлын эхлэл тавигдаж байгаа юм. Өнөөдрийн байдлаар нутгийн иргэдэд түшиглэсэн аялал жуулчлал “Ундрал” нөхөрлөл болон АЗДТГазарт томоохон эвент, арга хэмжээн дээр ашиглах зориулалттайгаар зөөврийн хоёр, нийт гурван эко жорлонг байршуулахаар боллоо. 
Мөн аялал жуулчлалын маркетингийн судалгаа хийхээр орон нутгийн баг ажиллаж Увс аймгийн байгалийн үзэсгэлэнт газрын зургуудаар альбом хийх, видео мэдээлэл бэлтгэх, зургийн фондтой болох зориулалтаар тус төслөөс 5 сая төгрөгний дэмжлэг үзүүлэх гэрээнд гарын үсэг зурлаа.

Увс аймаг бол аялал жуулчлал хөгжих бүрэн боломжтой газар тийм ч учраас жилээс жилд Увс аймгийг зорих жуулчдын тоо нэмэгдэж байгаа. Харин жуулчдын тав тухыг хангах, байгаль эх дэлхийгээ хамгаалахын тулд жорлонгийн асуудлыг зайлшгүй шийдэх шаардлагатай.

Хүн ам шигүү суурьшсан газруудад нэг хашаанд дунджаар 2-3 айл байдаг бөгөөд айл бүрийн 4-5 хүний өдөр бүрийн 3-4 удаагийн хэрэглээ нь газрын гүний хөрсөнд оршдог үй түмэн усан судлуудыг нэвчиж, бидний амин хэрэглээ болсон газрын гүний цэвэр усны нөөцийг хордуулж байдаг. Өнөөдөр байр орон сууцанд боловсон жорлондоо тухалж байгаа хүмүүст нүхэн жорлонгийн шинэчлэл огт хамаагүй мэт ойлгогдох боловч, харамсалтай нь бодит амьдрал дээр бидний газар доорх усны нөөц нэг л болохоор тэр нөөц бохирдвол байрны хүмүүс ч өтгөний нянгаар өвчлөх, халдварлах магадлал өндөр болоод байгаа юм. Чухам ийм л учраас Жорлонгийн шинэчлэлийг нэн даруй, хүн бүрийн оролцоотойгоор эхлүүлэх, өрнүүлэх шаардлагатай байгаа юм байна.